ភ្នំពេញ៖ នាយករដ្ឋមន្ត្រីកម្ពុជា សម្តេចតេជោ ហ៊ុន សែន មិនអាចទទួលយកបានឡើយនូវប្រទេសដែលផលិតថ្នាំយកប្រជាជនកម្ពុជាធ្វើជាអ្នកសាកល្បងថ្នាំ។
សម្តេចពោលនៅក្នុងពិធីបិទសន្និបាតក្រសួងសុខាភិបាលលើកទី៤២ នៅសណ្ឋាគាររ៉េស៊ីដង់សុខាភ្នំពេញ នារសៀលថ្ងៃទី៧ ខែមីនា ឆ្នាំ២០២៣ ថា៖ «កុំយកប្រជាជនកម្ពុជាធ្វើជាកន្លែងធ្វើតេស្តថ្នាំរបស់ប្រទេសណាមួយឱ្យសោះ ទុកឱ្យគេធ្វើតេស្តប្រជាជនគេទៅ បើមានប្រសិទ្ធភាពចាំយើងយកមក»។
សម្តេចបានសង្កត់ធ្ងន់ថា កម្ពុជាមិនមែនជាធុងសំរាមបោះចោលបច្ចេកវិទ្យាហួសសម័យឡើយ។ សម្តេចថ្លែងថា៖«កម្ពុជាអត់ទទួលនូវអ្វីដែលហួសសម័យទេ រាប់ទាំងផ្នែកឌីជីថល អាចាស់នៅស្រុកគេ អាថ្មីនៅស្រុកយើង អត់ទេ»។
សម្តេចតេជោបានណែនាំឱ្យក្រសួងពាក់ព័ន្ធ មុនអនុញ្ញាតឱ្យនាំចូលផលិតផលអ្វីមួយគឺត្រូវមានការត្រួតពិនិត្យឱ្យបានហ្មត់ចត់ដើម្បីធានាថាផលិតផលនោះមានសុវត្ថិភាពចំពោះសុខភាព៕
